Rematando o traballo

Os membros do grupo 4U do TGP chegamos á fin da nosa labor de colaboración tanto coa Sociedade de Debate de Competición (SODECO) como con Comunicación Estudiantil (COES). En primeiro lugar destacamos a conclusión adquirida tras integrarnos no mundo dos debates. Un mundo de respecto, argumentos e valores  no que nos vimos inmersos en diversas datas e onde puidemos comprobar que non existe unha única opinión válida sobre un tema e que todo punto de vista ben argumentado ten a súa parte de razón. OS temas tratados foron explicados en profundidade no post anterior.

No tocante á experiencia en COES, incidir na importancia dunha boa organización en defensa do estudantado. En contra do pensado, atopamos unha asociación aberta e plural, onde calquera pode opinar, colaborar e loitar polos dereitos do alumnado. Vimos toda a labor que levan a cabo, que por certo é  bastante amplia e debería ter máis recoñecemento do outorgado por todos.

Ademais das actividades de participación destacaremos a asistencia ás II Xornadas MNG, que nos aportaron unha renovada visión sobre os problemas concernintes ao idioma galego así como á súa integración na sociedade moderna. Tamén tiveron un papel moi informativo no referente ás novas tecnoloxías e á súa utilización en ámbitos tan dispares coma as relacións persoais e a política que son fundamentais para o funcionamento da sociedade.

TGP 4U