-Por que levas ese estúpido traxe de coello? -Por que levas ese estúpido traxe de home?

O poder de creación da mente humana é infinito. A nosa imaxinación é capaz de construír mundos extraordinarios nos cales cada un de nós somos os protagonistas. Vénseme á cabeza un dos filmes contemporáneos que máis me chamou a atención: Donnie Darko.

Donnie é un adolescente cunha intelixencia e unha imaxinación desbordante que, segundo diagnóstico, padece esquizofrenia. Atópase no medio de dous mundos alternos: o real e o imaxinario, que en ocasións converxen. As súas relacións persoais coa súa familia e amigos e o seu comportamento no seu entorno están condicionados por este tipo de experiencias surrealistas.

O alter ego do protagonista responde ás ordes de Frank, un ser diabólico que vive na súa mente. Frank trátase dunha prolongación de Donnie, dunha personalidade latente que só consegue desenvolver durante os seus trastornos psicolóxicos.

Durante estas viaxes a través da súa propia mente, Donnie consegue levar a cabo comportamentos violentos con resultados impactantes. A enfermidade de Donnie bríndalle a oportunidade de elixir, de burlar o destino e esquivar a súa morte con tódalas consecuencias que provocaría ou permitir o curso natural dos acontecementos.

Porén, Donnie prefire o mundo real, o de carne e óso, onde coñece o amor, onde pode rir cos amigos e gozar da súa familia. É por iso polo que decide romper coas súas experiencias mentais, co seu “outro eu” e volver á realidade, a pesar de que iso traia consigo a súa morte.

 

Bouza Veiga, S1B, S1A3