Xornalismo vs. Dereito

O día 10 de abril o noso grupo foi convidado polo docente desta materia para dar unha charla aos alumnos de Técnicas de Expresión de 1º de Dereito da USC (esta materia tamén é impartida por Marcelo). O que pretendíamos era transmitirlle aos estudantes como se presentan os desafiuzamentos nos medios de comunicación, e realizar un pequeno foro de debate con eles.

Previamente, os alumnos xa tiveran unha toma de contacto co tema a tratar, posto que fixeron uns textos de elaboración propia sobre os desafiuzamentos, aínda que a maioría deles presentaban a súa opinión e o marco xurídico no que se desenvolve.

Foron tres horas intensas (dúas clases de hora e media cada unha), nas que expoñemos dúas veces o mesmo tema, con escasas diferenzas entre unha clase e outra. Persoalmente, o que atopei máis interesante foi o debate e as preguntas finais. Se os medios de comunicación influían ou non na opinión das masas, se estaban dándolle o trato correcto aos desafiuzamentos e á plataforma, se os responsables eran os bancos ou os particulares que asinaban, se era a partes iguais… Foron algúns dos principais puntos a tratar.

Penso que o obxectivo inicial se acadou, ademais logramos un intercambio de ideas e houbo unha boa comunicación entre o grupo e nós, na que ámbalas partes nos beneficiamos: eles, obtendo unha visión distinta dos desafiuzamentos, á marxe do marco xurídico; nós, aprendendo o marco xurídico no que se integran os desafiuzamentos, así como as opinións doutras persoas alleas ao mundo da comunicación.

T2A