Arquivo do blog

Asuntos privados dos cargos públicos?

O pasado domingo a cabeceira compostelá El Correo Gallego adiantaba que o alcalde Gerardo Conde Roa dimitiría do seu cargo, como se leva esixindo dende certos sectores da cidadanía e os grupos da oposición dende que se coñeceu a súa imputación por defraudar case 300.000 a Facenda. O código ético do xornalista recolle que este non debe traspasar a fronteira entre os asuntos privados dunha persoa cos seus asuntos ou cargos públicos, mais moitas veces a situación desta fronteira é obxecto de debate, as máis das veces interesado.

Non se pode comparar a vida sexual dunha persoa, as desavinzas dentro da súa familia ou casos polo estilo con, por exemplo, o seu oficio ou, neste caso, coa súa propiedade. No eido local isto cobra especial relevancia, sobre todo nas localidades pequenas como é o caso que nos ocupa, pois o tópico de que “todos nos coñecemos” e “ao final todo se acaba sabendo” toman especial relevancia. O xornalista debe distinguir entre eses primeiros asuntos que poderían resultar moi escandalosos e que de seguro lle interesarían a moita xente mais, e isto é o importante, non son de interese público; e os asuntos que si o son. Aquilo que atinxe ao pasado profesional, a carreira, ou a propiedade dun cargo público si que é de interese público, polo simple feito de que os intereses que van parellos a esa propiedade van incidir directamente no desenvolvemento do seu cargo electo.

Conde Roa fixo ben en dimitir e, os xornais que o presionaron, sempre movidos por unha variedade de motivos e intereses, fixeron ben en presionalo, pois a información que atinxe á súa empresa e ao seu fraude era de interese público, pois ao defraudar ao Estado estás defraudando a toda a cidadanía que sí que paga impostos para manter o ben público.

Ríos, Raúl cl4x

Conde Roa e Leo Bassi, local e global

Este martes circulaba polas redes sociais de todo o Estado a noticia de que o alcalde compostelán, Gerardo Conde Roa, cancelara a actuación do humorista Leo Bassi. Tamén se fixeron eco os principais medios de comunicación galegos. Aínda que nun primeiro momento o rexedor xustificara a cancelación coa coincidencia doutras propostas no programa, rematou por recoñecer que era el o que persoalmente non gostaba do artista: “Leo Bassi me produce especial repugnancia”. De aí desprendeu que non había ningún interese en que “a cultura compostelá se identifique con este tipo de humor”.

Podemos ver as claras conexións que se producen entre o eido local e o estatal ou global, que hoxe en día se ven máis aceleradas, case que súbitas, grazas ás redes sociais que permiten a participación da comunidade cidadá. Por unha banda, está a cidadanía do local, de Santiago, que se fai eco da nova e, pola outra, o propio humorista Leo Bassi, que aproveita para brincar co tema subindo ao seu facebook unha popular foto de Conde Roa bailando o pasado nadal coas Mamás Noel, co pé de foto “Aquí Alcalde de Santiago de Compostela, señor Conde Roa en una de sus propuestas culturales por su ciudad“ (http://on.fb.me/GUr77g). Ademais da brincadeira, Bassi cualificou a cancelación da súa actuación como “censura”.

Deste xeito, unha nova de trascendencia local, que nun principio só afectaría á festa da Ascensión de Santiago, adquire eco alén da comunidade da cidade, chegando a outros usuarios que adaptan a mensaxe ás realidades de seu (que en parte coinciden coa de Santiago, en tanto que fai parte do Estado español e está gobernada polo PP, mais tamén con temáticas locais propias). Un usuario comentaba na rede social: “Es que esto es la cultura para el PP. El pasado invierno la única oferta cultural de Oviedo fue la Ópera y… “Bob esponja, el musical”, relacionando a nova coa súa cidade, Oviedo, e cunha realidade de nivel estatal, as propostas culturais do PP.

Ríos Rodríguez, CLX4