Arquivo do blog

A importancia de quen opina

Un dos grandes problemas da cidade de Pontevedra é a acumulación de tráfico no centro da cidade, o cal se ve triplicado en vésperas de festivos, nos días chuviosos e cando as estradas da cidade están en obras, cousa bastante común, sobre todo actualmente, coas obras do AVE. Dende outubro do ano pasado e ate o día de hoxe, a rúa Loureiro Crespo está cortada ao trafico á altura da Pasarela, xa que se está acondicionando este tramo para o paso do novo tren de alta velocidade. Por enésima vez se ve sobrepasado o prazo para rematar estas obras, xa que nun principio se estimaba que estarían listas para febreiro deste ano.

Obras en Loureiro Crespo

Vista aérea das obras de Loureiro Crespo

O Diario de Pontevedra informa no día do traballador do estado desta reforma, que novamente incumpre os prazos establecidos. María Boullosa, a redactora desta información, comeza citando as queixas que o Goberno Local trasladará ao Ministerio de Fomento e á empresa adxudicataria desta obra. En orde cronolóxico vanse expresando os diferentes puntos de vista de cada bando. Ate aquí todo correcto.

Na segunda parte desta noticia, Boullosa céntrase na opinión dos cidadáns e nos problemas que isto lles crea. É neste apartado onde a noticia frouxea, xa que a opinión dos cidadáns é algo etéreo, porque as súas testemuñas son identificadas como “fontes próximas á asociación de comerciantes”. ¿Non terían que ser os propios cidadáns con nome e apelido os que se queixen da súa situación?. Ademais, o curte na estrada tamén desfavorece aos condutores que día a día teñen que variar o seu traxecto debido a esta reforma e a les nin sequera se refiren.

Deste xeito, e como sucede con moitas outras noticias, parece que as veces importa máis o que di o Goberno Local que o que pensan os afectados que día a día se ven somerxidos nesta clase de problemas.

Cardalda Vidal, CL4X

Un xornalismo máis próximo é posible

Hoxe en día a maioría dos medios para os que traballan os xornalistas están ó servizo dos diferentes poderes e moi pouco ó da cidadanía. No xornalismo local quizais se note máis esta ausencia de servizo, xa que debe centrarse máis na comunicación que na información pura e dura. Os medios locais ata o de agora pouco ou nada se preocupaban polos cidadáns, pero creo que algo cambiou coa chegada do xornal dixital Praza Pública o pasado Xaneiro. A versión dixital dos medios tradicionais é un calco da impresa, podería ser ben diferente e incorporar máis elementos de interactividade co cidadán, pero polos motivos que sexan, non o fan. Praza Pública é un xornal no que se elaboran as novas con rigor, contextualizando, contrastando información, consultando varias fontes e tratando así os temas dende varias perspectivas. Os xornalistas que alí traballan resultan cercanos para o cidadán porque tratan os temas dende outro prisma que os vincula máis ós problemas cotiás.

Un exemplo é o que ocorre coa noticia da polémica urbanización na Finca de Espiño en Santiago. Mentres que en Praza falan de plataformas cidadás que denuncian, fan un resumo do acontecido explicando o tema e dan unha versión moi ampla do tema, no xornal La Voz de Galicia, as novas están relacionadas todas cos políticos de turno.

http://praza.com/movementos-sociais/196/unha-plataforma-cidada-denuncia-o-espolio-da-finca-do-espino-e-a-politica-urbanistica-de-conde-roa/

http://www.buscavoz.es/search.php?q=Finca%20Espi%C3%B1o%202012&p=1&t=all&s=relevance

Co traballo de xornalistas con este perfil pode que haxa salvación para a reputación da profesión da comunicación, sobre todo da local.

Rodríguez Martínez, Raquel     CL4X

O caixón de xastre do xornalista local

O xornalismo local é unha fiestra aberta que vai dar á casa do veciño. Non importa que aconteza detrás das súas paredes: economía, política, cultura, ciencias, deporte. Nárrase todo. O perfil do xornalista local en Galicia debe ter a silueta da bisbarra pola que se move por riba dos temas a tratar. Así, atopámonos con noticias sobre economía e cultura asinadas pola mesma persoa. O xornalista de La Voz de Galicia para a comarca de Fisterra entrevistaba a Tatiana Rodríguez, responsable da empresa Lar, para extraer información sobre un concurso de murais de formigón, aos que os escolares atavían de azulexos a xeito de collage. Meses despois, o tema, centrado novamente en Cee, debullaba as causas da paralización do seu polígono. O terreo está invadido pola fauna mentres o debate sobre o prezo da parcela en litixio –que a xustiza cifra en 8 euros/metro- segue aberto, e cando aínda está por determinar o custo do seu subministro eléctrico polo que Gas Natural demanda 800.000 euros.  

Caso semellante é o do correspondente de El Correo Gallego na Costa da Morte, quen pasa de falar do Plan Revive e das axudas dun 85% en investimento que a Administración pública pon a disposición dos empresarios da Costa da Morte; a escribir de etnoloxía no Castelo de Vimianzo, ou da oda ao congro que se artella en Muxía. No entanto, os trazos do perfil do xornalista local dilúense coa información ata o punto de convertelo nun axente noticioso. Jesús Trillo é unha peza máis da información ao tomar parte na Mostra do Encaixe de Camariñas coma moderador dunha mesa redonda

Ameixeiras Cundíns, CL4X