Cartos de verdade para praias de mentira
Dise que o mar da Costa da Morte é insubornable. Pero o certo é que no fin da terra case todo é posible. Incluso derrotar ao mar. Corcubión xa lle botou un pulso. 80.000 toneladas de recheo ao litoral e 1,1 millóns de euros de orzamento. Está derrotando ao mar e a preto da metade dos habitantes do municipio, que lle ensinaron os dentes. O socialista Francisco Javier Lema, rexedor e imputado na sonora operación Orquestra, non se sinte cómodo coas críticas e ordenou estes días a retirada dunha pancarta do Colectivo en Defensa da Ría de Corcubión e dos nacionalistas en contra da construción dunha praia artificial nunha zona C.
Nun pleno de xaneiro de 2012, foi ratificada por segunda vez unha moción (promovida polo BNG e apoiada polo PP) en contra da obra. Porén, a súa realización xa foi aprobada pola Dirección Xeral de Costas e comezada a licitar. Información da que, ao parecer, carecía o propio Lema, pois refutou á oposición escudándose en que non se pode anular un proceso sen licitar. Igualmente, referiuse á praia artificial de Cee onde “nin houbo contaminación, nin se acabou o marisqueo”. Agora, xa se carreta o caolín de Vimianzo ao areal.
A información non deixou de saír nos xornais, locais e autonómicos, desde que se propuxo a creación da praia hai cinco anos. Incluso un informe da Xunta investigou o impacto da obra. É un exemplo de como, ás veces, os movementos sociais locais non conseguen mudar a axenda administrativa, pero si a axenda mediática.
Ameixeiras Cundíns, CL4X
Posted on 13 Marzo, 2012, in Documentos and tagged Comunicación Local, Corcubión, Costa da Morte, Curso 2011-2012, praia artificial. Bookmark the permalink. 2 Comentarios.
Non coñecía este caso e paréceme moi triste que non aprendamos dos erros das praias artificiais. Poño por caso a praia de Sada, á que se lle engadiron uns metriños e agora, cando baixa algo a marea, é imposible bañarse e aturar o cheiro da braña que alí se formou, limo que sempre estivo alí, pero cuberto por algún metro máis de auga.
Moitas grazas polo comentario. Pois verás, un dos principais problemas é que esta ría está catalogada coa zona C, é dicir, é unha zona onde hai moito marisco pero está contaminado. Actualmente, desde a Xunta están intentando depurar o marisco destas zonas para poder comercializar con el. Pero se finalmente se acaba de construír a praia, vai ser practicamente imposible. Ameixeiras Cundíns, CL4X